ଷ୍ଟୋରିଜ ଓଡ଼ିଶା ଏକ ୱେବ ପୋର୍ଟାଲ ହେଲେ ମଧ୍ୟ ଏହା ଅନ୍ୟ ୱେବ ପୋର୍ଟାଲଠାରୁ ଭିନ୍ନ ସ୍ୱାଦର । ଏଥିରେ ନିୟମିତ ଖବର ନୁହେଁ ବରଂ ଓଡ଼ିଶାର ଗାଁ ଗହଳିରେ ରହୁଥିବା ଲୋକଙ୍କ ଜୀବନ ଜୀବିକା ସଂପର୍କିତ ଫିଚର ପ୍ରକାଶ ପାଇଥାଏ । ବିଶେଷ କରି ଦୂରଦୂରାନ୍ତ ଅଞ୍ଚଳରେ ରହୁଥିବା ଆଦିବାସୀ, ଦଳିତ, ମହିଳା ଓ ଶିଶୁମାନଙ୍କ କାହାଣୀକୁ ପ୍ରକାଶ କରିବାକୁ ଷ୍ଟୋରିଜ ଓଡ଼ିଶା ଅଗ୍ରାଧିକାର ଦେଇଥାଏ । ସବୁଠାରୁ ଗୁରୁତ୍ୱପୂର୍ଣ ହେଉଛି ଏହି ପ୍ରସଙ୍ଗଗୁଡିକ ଲିଙ୍ଗଭିତିକ ଦୃଷ୍ଟିକୋଣରୁ ସଂବେଦନଶୀଳ ଭାବେ ଲେଖାଯିବାକୁ ଚେଷ୍ଟା କରାଯାଇଥାଏ ।
୨୦୨୫ ରେ ଷ୍ଟୋରିଜ ଓଡ଼ିଶା ଏ କ୍ଷେତ୍ରରେ ପାଦେ ଆଗେଇ ବାନ୍ଧବୀ ନାମରେ ଏକ ପ୍ରୋଜେକ୍ଟ ଆରମ୍ଭ କରିଛି, ଯାହାର ଉଦ୍ଦେଶ୍ୟ ହେଉଛି ସାମ୍ବାଦିକତା କ୍ଷେତ୍ରରେ ନୂଆ କରି ଆସିଥିବା ଏବଂ ସାମ୍ବାଦିକ ହେବାକୁ ଚାହୁଁଥିବା ଝିଅ ମାନଙ୍କୁ ସ୍ୱତନ୍ତ୍ର ଭାବେ ବାଛି ସେମାନଙ୍କୁ ରୁରାଲ ଜର୍ଣ୍ଣାଲିଜିମ ବା ଗ୍ରାମୀଣ ସାମ୍ବାଦିକତା କ୍ଷେତ୍ରରେ ଟ୍ରେନିଂ ହେବା ଓ ନିଜ ଅଞ୍ଚଳରୁ ରିପୋର୍ଟ କରିବାର ସୁଯୋଗ ଦେବା । ଏହି କ୍ରମରେ ଆମେ ଗତବର୍ଷ ଓଡ଼ିଶାର କେତେକ ବଛା ବଛା ଜିଲ୍ଲାରୁ ଆଗ୍ରହୀ ପ୍ରାର୍ଥୀଙ୍କୁ ବାଛି ସେମାନଙ୍କୁ ତିନିଦିନର ଟ୍ରେନିଂ ଦେଇଥିଲୁ । ଶିକ୍ଷା, ସ୍ୱାସ୍ଥ୍ୟ, କୃଷି, ମହିଳା ସଂପର୍କିତ ଖବରକୁ କିପରି ରିପୋର୍ଟିଂ କରିବେ ଏବଂ ଭିଡିଓ ନେବେ, ମୋବାଇଲରେ କିପରି ରିପୋର୍ଟିଂ କରିବେ, ସ୍ରିପ୍ଟ କିଭଳି ଲେଖିବେ ଆଦି ବିଭିନ୍ନ ବିଷୟରେ ବିଶେଷଜ୍ଞମାନେ ପ୍ରଶିକ୍ଷଣ ଦେଇଥିଲେ । ଏହି ପ୍ରୋଜେକ୍ଟ ବାନ୍ଧବୀ କାର୍ଯ୍ୟକ୍ରମ ପାଇଁ ଯେଉଁମାନେ ମନୋନୀତ ହୋଇଥିଲେ ସେମାନେ ହେଲେ ପୁରୀର ଲିଜା ସେନାପତି, ରାୟଗଡାର ବନିତା ନିଶିକା, ମୟୁରଭଞ୍ଜ ଚୁଳ ହାଁସଦା, ଢେଙ୍କାନାଳର ସୌମ୍ୟା ରାଜଶ୍ରୀ ସାହୁ ଓ କଳାହାଣ୍ଡିର ଅର୍ଚ୍ଚନା ଲହଜଲ ।